Hvað er árangur fyrir Von?

Ný verðmæti
úr gamalli hefð

Jóhannes Egilsson - framkvæmdastjóri Vonar harðfiskverkunar

Íslenski harðfiskurinn er varan sem allur heimurinn er að leita að núna – stútfull af próteini, umhverfisvæn og engin kolvetni. Við keyptum félagið árið 2019 vegna þess að við sáum tækifæri til að skapa eitthvað nýtt. Okkur langaði að byggja á íslensku harðfiskshefðinni, sem er jafn gömul byggð á Íslandi, en nálgast hana á nýjan hátt.

Þessi gamla hefð verður að þróast og nútímavæðast ef hún á að ganga kynslóða á milli. Við þurfum að hugsa um verkunina sem nútímalega matvælagerð og harðfiskinn sem hluta af daglegu neyslumynstri fólks, með öllu sem því tilheyrir. Þetta kallar á nýja tækni, ný vinnubrögð og vandaðri umgjörð, sem og hönnun umbúða og vörumerkja. Þá erum við ekki síst að horfa út fyrir landsteinana. Ísland er auðvitað ekki eina landið sem á þessa hefð og í dag erum við að flytja út harðfisk til Noregs, Grænlands og Færeyja.

 
Við notum kæliþurrkun sem er hönnuð til að líkja eftir gömlu hjallaþurrkuninni. Það sem áður tók sex til átta vikur tekur núna aðeins þrjá til fimm daga. Margir halda að harðfiskurinn úti í búð hafi verið veiddur fyrir mörgum mánuðum – staðreyndin er þó sú að þegar þú kaupir poka af Gullfiski eru líklega í kringum tíu dagar síðan fiskurinn kom á línuna. Við fórum líka í innihaldsrannsóknir. Það vita allir að harðfiskur er hollur, en nú til dags verðum við t.d. að geta sagt fólki hversu mikið af B12 er í 100 grömmum.

Íslenskur fiskur er besta hráefni í heimi og við erum svo lánsöm að næstum allt hráefnið okkar kemur að landi hér í höfninni í Hafnarfirði. Harðfiskurinn verður aldrei betri en hráefnið. Þetta skiptir gríðarlegu máli, því á bak við 200 grömm af harðfiski eru tvö kíló af ferskum íslenskum gæðafiski. Árangur okkar byggir á að nýta þetta hráefni vel, varðveita gæðin og skila þeim til neytenda á nútímalegan hátt.